- Yaratildi: 28.03.2022
- Yangilandi: 28.03.2022
- O'qildi: 4182
Respublika mediaforumining tafsilotlari
2022-yil 25-30-mart kunlari “Navoiy kon-metallurgiya kombinati” aksiyadorlik jamiyati, O‘zbekiston Jurnalistlari ijodiy uyushmasi hamkorligida “Milliy jurnalistika: anʼanalar davomiyligi va zamonaviylik” mavzusidagi respublika mediaforumi o‘tkazilmoqda.
Respublika mediaforumining 1-kunida Navoiy shahridagi “NKMK tarixi” muzeyida Navoiy viloyati tahririyatlari muharrirlariga “Yurida-Orfo” kompyuter dasturini bepul o‘rnatish uchun sertifikatlar tantanali topshirildi hamda O‘zbekiston Jurnalistlari ijodiy uyushmasining Farg‘ona va Andijon viloyatlari bo‘limlari raislarining olib borayotgan ishlari haqidagi axborotlari tinglandi.
Mediaforumning 2-kunida Navoiy davlat konchilik institutida tantanali ochilish marosimi o‘tkazildi. Tadbirda forum mehmonlari O‘zbekiston Jurnalistlari ijodiy uyushmasi raisi Olimjon O‘sarov, O‘zbekiston jurnalistika va ommaviy kommunikatsiyalar universiteti rektori Sherzodxon Qudratxo‘ja, O‘zbekiston Respublikasi Oliy Majlisi Qonunchilik palatasi deputati Rasul Kusherbayevlar so‘zga chiqishdi. Shuningdek, shu kuni tadbir ishtirokchilari uchun Navoiy mashinasozlik zavodiga press-tur tashkil etildi. Press-tur davomida ishtirokchilar zavoddagi Navoiy davlat konchilik institutining kon-metallurgiya sanoatiga ixtisoslashgan texnoparki va sexlarda bo‘lib, korxonada ish jarayonlari va ishlab chiqarish quvvatlarini oshirish bo‘yicha olib borilayotgan amaliy ishlar bilan yaqindan tanishdilar.
Respublika mediaforumining 3-kunida Navoiy shahrining Yoshlar markazidagi media markazda O‘zbekistonda xizmat ko‘rsatgan jurnalist, "Jahon adabiyoti" jurnali bosh muharriri Ahmadjon Meliboyev, O‘zbekiston jurnalistika va ommaviy kommunikatsiyalar universiteti rektori Sherzodxon Qudratxo‘ja, Oliy Majlis Qonunchilik palatasi deputati Rasul Kusherbayev, “Ishonch” va “Ishonch-Doveriye” gazetalari bosh muharriri Husan Ermatov tadbir ishtirokchilari uchun mahorat darslarini o‘tishdi. Shu kuni Navoiy viloyatidan yangi nomzodlarga O‘zbekiston Jurnalistlari ijodiy uyushmasi aʼzolik guvohnomalari tantanali topshirildi. Quvonarlisi, Uyushmaga aʼzo bo‘lganlar orasida “NKMK” AJ vakillari - "Konchilar hayoti" gazetasi muharriri Nizomiddin Sadiriddinov va muxbiri Azamat Zaripovlar ham bor.
Bugun, 28-martda, respublika media-forumining to‘rtinchi kunida tadbir ishtirokchilari uchun Markaziy kon boshqarmasidagi 5-gidrometallurgiya zavodi, “Muruntov” koni va 7-gidrometallurgiya zavodlariga press-turlar o‘tkazilishi rejalashtirilgan.
"NKMK" AJ matbuot xizmati.