- Yaratildi: 20.11.2025
- Yangilandi: 20.11.2025
- O'qildi: 69
“Korrupsiyaga qarshi kurashish oyligi” doirasida “Ochiq eshiklar kuni” tadbiri o‘tkazildi
“Navoiy kon-metallurgiya kombinati” aksiyadorlik jamiyati faoliyatida ochiqlik va shaffoflikni taʼminlash, korrupsiyaga qarshi kurashish borasida ishchi-xodimlarning huquqiy ongi va madaniyatini oshirish maqsadida kombinatda 9-dekabr – Xalqaro korrupsiyaga qarshi kurashish kuniga bag‘ishlab, joriy yilning 10-noyabr kunidan 10-dekabr kuniga qadar “Korrupsiyaga qarshi kurashish oyligi” o‘tkazilmoqda.
20-noyabr kuni Navoiy shahridagi “NKMK tarixi” muzeyida ommaviy axborot vositalari vakillari va jurnalistlar, kombinat ishchi-xodimlari uchun “Ochiq eshiklar kuni” tadbiri tashkil etildi.
Tadbirda O‘zbekiston Respublikasi Korrupsiyaga qarshi kurashish agentligining masʼul xodimi M. Rasulov, Tog‘-kon sanoati va geologiya vazirligi Korrupsiyaga qarshi ichki nazorat (komplayens-nazorat) bo‘limi boshlig‘i Sh. Sag‘dullayev, Navoiy ixtisoslashtirilgan prokurori N. Tilavov, Navoiy viloyat Raqobatni rivojlantirish va isteʼmolchilar xuquqlarini himoya qilish xududiy boshqarmasi boshlig‘i o‘rinbosari M. Elmurodov, “NKMK” AJ Komplayens xizmati boshlig‘i R. Avezovlar tomonidan mavzuga oid maʼruzalar qilindi.
Tadbirda targ‘ibot bukletlar tarqatildi hamda maxsus video rolik namoyish etildi.
Kombinatda korrupsiyaga qarshi kurashish hamda ochiqlik va shaffoflikni taʼminlash bo‘yicha 2025-yilning o‘tgan 10-oyida amalga oshirilgan ishlar xaqida hisobot berildi. Taʼkidlash kerakki, Korrupsiyaga qarshi kurashish agentligi tomonidan eʼlon qilingan 2024-yil yakunlari bo‘yicha korrupsiyaga qarshi kurashishdagi ishlari samaradorligi reyting baholash natijalariga ko‘ra, davlat organlari va tashkilotlari orasida “NKMK” AJ 96 ball bilan faxrli 1-o‘rinni egallab, korrupsiyaga qarshi kurashish bo‘yicha ishlari eng yuqori natijani qayd etdi.
2024-yilda “NKMK” AJda korrupsiyaga qarshi kurashish sohasida tashkil etilgan boshqaruv tizimi va mexanizmlar “Korrupsiyaga qarshi kurashish menejment tizimi” ISO 37001:2016 xalqaro standarti talablariga muvofiqligi “CERT International” tashkiloti tomonidan tashqi auditdan o‘tkazilib, mazkur xalqaro standart sertifikatini qo‘lga kiritgan edi. Joriy yilning 28-29-iyul kunlari “CERT International” tashkiloti tomonidan ushbu xalqaro standartning talablari bajarilishi yuzasidan birinchi kuzatuv auditi o‘tkazildi. Audit natijalariga ko‘ra, kombinat faoliyatining korrupsiyaga qarshi kurashish tizimi yana bir bor xalqaro standart talablariga muvofiq deb baholandi va tashkilotga berilgan mazkur sertifikat bir yil davomida amalda bo‘lishi tasdiqlandi.
Yaqinda “NKMK” AJ Birlashgan Millatlar Tashkilotining barqaror rivojlanish sohasidagi eng yirik xalqaro tashabbusi – Global kelishuviga qo‘shildi. BMTning Global kelishuvi inson huquqlari, mehnat munosabatlari, atrof-muhitni muhofaza qilish va korrupsiyaga qarshi kurashish bo‘yicha universal tamoyillarga amal qiladigan kompaniyalarni birlashtiradi. Kombinat BMTning Global kelishuviga qo‘shilganligi kompaniyaning o‘z faoliyatiga mazkur kelishuvning 10 ta tamoyiliga rioya qilishi, korporativ boshqaruvni takomillashtirishi, shaffoflikni oshirishi va BMTning Barqaror rivojlanish maqsadlarini integratsiya qilishga intilishini aks ettiradi.
Bugungi kunda kombinat faoliyatida ochiqlik va shaffoflikni taʼminlash, korrupsiyaviy harakatlarni oldini olish va bartaraf etishga katta eʼtibor qaratilayotganligi alohida taʼkidlab o‘tildi. Xususan, davlat organlari va tashkilotlarida 2024-yilda ochiqlik bo‘yicha amalga oshirilgan ishlarning samaradorligi va natijadorligini baholashga qaratilgan “Ochiqlik indeksi”da “NKMK” AJ 89.2 ball bilan ketma-ket uchinchi yil eng yuqori samaradorlik ko‘rsatkichlaridan birini qayd etib, 4-o‘rinni egalladi. Aksiyadorlik jamiyatlari kesimida esa kombinat 22 ta yirik sanoat korxonalari hamda kompaniyalar orasida 3-o‘ringa sazovor bo‘ldi.
Shuningdek, tadbir ishtirokchilariga mamlakatimizda korrupsiyaga qarshi kurashish bo‘yicha qabul qilingan normativ-huquqiy hujjatlar mazmun-mohiyati, olib borilayotgan ishlar, korrupsiya uchun javobgarlik masalalari, uni oldini olishga qaratilgan chora-tadbirlar hamda mazkur yo‘nalishdagi xorijiy tajribalar atroflicha tushuntirildi.
Tadbir yakunida OAV vakillari va jurnalistlar, kombinat ishchi-xodimlarining savollariga batafsil javoblar berildi.
“NKMK” AJ Matbuot xizmati