- Yaratildi: 31.03.2023
- Yangilandi: 31.03.2023
- O'qildi: 7126
“NKMK" AJ faoliyatining 2022-yil yakunlari bo‘yicha matbuot anjumani o‘tkazildi
2023-yil 31-mart kuni Navoiy shahridagi “NKMK tarixi” muzeyida “Navoiy kon-metallurgiya kombinati” aksiyadorlik jamiyati faoliyatining 2022-yil yakunlari bo‘yicha ommaviy axborot vositalari vakillari va jurnalistlar uchun matbuot anjumani o‘tkazildi.
Matbuot anjumanida “NKMK” AJ bosh direktorining iqtisod va moliya bo‘yicha o‘rinbosari Shuhrat Aminov, Byudjetlashtirish va kontrolling bo‘limi boshlig‘i Umidjon Kostayev, Jamoatchilik bilan aloqalar bo‘yicha direktor Xolmamat Raupov, OAV vakillari va jurnalistlar ishtirok etishdi.
O‘zbekiston Respublikasi Prezidenti tashabbusi bilan kombinatda zamonaviy korporativ boshqaruv tizimini joriy qilish, raqobatbardoshlikni oshirish, mavjud ishlab chiqarish quvvatlarini kengaytirish, sohaga to‘g‘ridan-to‘g‘ri xorijiy investitsiyalarni jalb qilish maqsadida 2022-yil 1-yanvardan boshlab korxona “Navoiy kon-metallurgiya kombinati” aksiyadorlik jamiyati sifatida ish boshladi.
2022-yil 30-may kuni kombinat tarixida ilk marotaba 2021-yil uchun moliyaviy hisobotlarning to‘liq majmuasi Moliyaviy hisobotning xalqaro standartlariga muvofiq tayyorlandi. Hisobot xalqaro audit kompaniyasi tomonidan tekshiruvdan o‘tkazildi va ijobiy xulosa berildi.
“NKMK” AJ mamlakatimizning yirik sanoat korxonasi hisoblanadi. Keyingi yillarda kombinatda strategik ahamiyatga ega investitsion loyihalar amalga oshirilayapti. Bu loyihalar doirasida 2022-yilda Tomdi tumani hududidagi “Balpantog‘” va “Tomdibuloq” konlarida birinchi portlatish ishlari amalga oshirildi va qazib olish ishlari boshlandi, “Tomdibuloq” konini 2-gidrometallurgiya zavodi bilan bog‘lovchi 35 kilometrlik temir yo‘l liniyasi foydalanishga topshirildi.
“NKMK” AJning respublika sanoat mahsulotlari ishlab chiqarishdagi ulushi 10,3 foizni, davlat byudjetiga jami tushumlarining ulushi esa 20,1 foizni tashkil etishi, 2022-yilda kombinat jahondagi oltin ishlab chiqaruvchi kompaniyalar reytingida 4-o‘rinni egallaganligi ta’kidlab o‘tildi.
2022-yilda “Navoiy kon-metallurgiya kombinati” aksiyadorlik jamiyati tomonidan 56,6 trln so‘mlik mahsulot ishlab chiqarildi. O‘sish surʼati o‘tgan yilga nisbatan 106,2 foizga teng bo‘ldi. O‘zbekiston Respublikasi Davlat byudjetiga 18,0 trln so‘m miqdorida soliqlar va majburiy to‘lovlar hamda davlat ulushiga 15,3 trln so‘m dividendlar to‘landi.
Investitsiya dasturi doirasida 486 mln dollarlik mablag‘ o‘zlashtirilib, 2 095 ta yangi ish o‘rinlari yaratildi. Mahalliylashtirish dasturi doirasida 554,6 mlrd so‘mlik mahsulot ishlab chiqarildi va tarmoqlararo sanoat kooperatsiyasi doirasida 4,8 trln so‘mdan ortiq mahsulot xarid qilindi. Xarajatlarni maqbullashtirish bo‘yicha kompleks chora-tadbirlar ijrosi mahsulot tannarxini qariyb 1,1 trln so‘mga kamaytirish imkonini berdi.
Matbuot anjumanida OAV vakillari va jurnalistlar savollariga atroflicha javob berildi.
Navoiy kon-metallurgiya kombinati – yuksak sifat, samaradorlik va ijtimoiy himoya kafolati! Kombinatda olib borilayotgan keng ko‘lamli amaliy ishlar natijada ishlab chiqarish samaradorligi va mehnat unumdorligini oshirish hamda mahsulot tannarhini pasaytirishga xizmat qiladi.
“NKMK” AJ matbuot xizmati.